Utprøving nye sortar er viktig for å gje dyrkarane plantemateriale av høg yteevne og kvalitet, tilpassa svært varierande veksevilkår i ulike delar av landet. Vi tester eittårige (grønfôr) og fleirårige (eng) artar av gras og belgvekstar. Vidare vert artane prøvde i forsøk med frøblandingar til slått og beite, for å finna korleis dei høver i lag eller konkurrerar med kvarandre.

---

Avling og kvalitet har nær samanheng med vilkåra for vekst på ulike jordartar. Bioforsk har høg kompetanse på næringsbehov og gjødslingsnormar til grovfôrvekstar, mineralinnhald i vekstane og gjødsling med husdyr- og handelsgjødsel. Vi arbeider og med tema som biologisk nitrogenfiksering, næringsstoffbalanse ved ulike driftsmåtar og jordpakking og køyreskader.

---

Korleis du nytter jord og planter er avgjerande for kva du får ut av dei. Sentrale tema er beitebruk og -åtferd til småfe og storfe, mjølk- og kjøtproduksjon frå beite og/eller konservert fôr. Vidare fôrkvalitets- og avlingsprognosar, og verknad av hauste- og driftsintensitet på avling, kvalitet og økonomi. Vi arbeider og med konservering av fôrvekstar, og fermenteringskvalitet og hygienisk kvalitet i konservert fôr.

---

Landbruk påverkar miljøet, og klima påverkar landbruket. Vi har og utviklar mykje kunnskap om utnytting og tap av næring ved ulik bruk av husdyr- og handelsgjødsel. Verknad av klima på plantevekst, med tilpassing av dyrkinga ved endra klimaforhold er ei sentral oppgåve. Utslepp av klimagassar frå grovfôrbaserte husdyrproduksjonar, i lag med den totale miljøbelastninga vert eit viktig tema.

---

Innan vårt fagområde er særleg samanhengane mellom fôrkvalitet, dyrehelse og matkvalitet sentrale. Døme på dette er utmarksbeite og ulike vekstars verknad på samansetning/kvalitet i mjølk og kjøt. Eit anna døme er verknaden av grovfôrkvalitet på dyrehelsa gjennom mineralinnhald eller beiteparasittar.

---