Bioforsk Nord Tjøtta har i dag sine viktigaste oppgåver knytte til ulike område innanfor landbruks- og miljørelatert FoU. I Bioforsk Nord har avdelinga på Tjøtta fått eit særleg ansvar for fagseksjonen "Miljø og utmark" som blant anna arbeider med førebyggjande tiltak mot rovdyrskadar. Forskarane ved avdelinga har også oppgåver knytte til naturbasert reiseliv, matkvalitet, kulturlandskap og økologisk landbruk. Konsekvensvurderingar knytte til både verneområde og utbyggingsområde er også viktige arbeidsoppgåver.

Bioforsk Nord Tjøtta har også status som fagsenter i landbruk, og i kraft av denne funksjonen samarbeider vi nært med Fylkesmannen i Nordland.

Bioforsk Nord Tjøtta har i dag 15 tilsette. Dei fleste av desse er forskarar med oppgåver innanfor landbruks- og miljørelatert FoU. Gjennom avtale med Tjøtta gard har avdelinga store ressursar med innmark, utmark og husdyr som kan brukast i forsøksverksemda. Ein del av garden vert driven økologisk, og blir brukt til FoU på dette fagfeltet. Bioforsk Nord Tjøtta disponerer også eit 20 000 daa stort utmarks- og fjellbeiteområde innanfor Lomsdal/Visten nasjonalpark.