Forsøksgarden Holt

Holt-eigedommen er på vel 400 daa. I tillegg leiger Bioforsk 55 daa av Troms Fylkeskommune (Åsgård-eigedommen). Av totalt 230 daa innmark er 35 daa Debio - godkjent økologisk areal.

På eigedommen er det til saman 14 bygningar, blant anna kontorbygg, klimalaboratorium i samarbeid med Universitetet i Tromsø, veksthus, barnehage og fleire bustadhus.

Det er lagt ned mykje arbeid for å opna Holt-eigedommen for allment bruk. Det er laga gode turstiar, natursti, arboret og treningsbane for golf på. Vi har også planar om å etablera ein 4H-gard i den gamle driftsbygningen.

Arktisk landbruk og miljø

Fagseksjonen omfattar forsking på nordleg produksjon av grovfôr, poteter, bær og grønsaker. Vi arbeider også med revegetering av utmark etter køyreskadar eller anleggsverksemd. Vi tek også på oss oppdrag som utgreiingar, konsekvensanalysar og liknande. Du finn meir om vårt faglige arbeid under fagområdet "Arktisk landbruk", undertema "Grønsaker og poteter under midnattssol", "Grovfôrproduksjon i Nord" og "Ville bær".

Nordnorsk kompetansesenter

Gjennom Nordnorsk kompetansesenter har Bioforsk Nord ei viktig rolle som regional tilretteleggjar for nyskaping og utvikling i landbruk og naturbruk. Målet er å initiera og støtta nærings- og kompetanseutvikling, og å stimulera til nyskaping både hos bønder, andre primærnæringsutøvarar, og vidare i verdikjedene. Gjennom sterke nettverk vil desse næringane oppnå og oppretthalda konkurransestyrke, sjølv om marknadstilhøve og rammevilkår endrar seg.

Nordnorsk kompetansesenter legg vekt på særeigne fortrinn, formulert som "arktisk kvalitet i produkt frå inn- og utmark". Vi jobbar særleg med næringsutvikling på fiskeressursar i innlandet, betre verdiskaping frå lokalmat, og med vidareutvikling og større mangfald i tradisjonell landbruksproduksjon. Vi ønskjer også å medverka til næringsutvikling i reindrifta.

Andre bedrifter

som held til på Holt er Universitet i Tromsø, Ayanda AS (ProBio), Tromsø og Omegn Forsøksring, Landbruk Nord og Naturtjenester i Nord AS.